عقل جميل

١٦ فبراير ٢٠٢١

-أنا شايف يا آنسة (رزان) أن التعليم اللي احنا بنتعلمه وبنجيب فيه مجاميع عالية مش بيخلينا نكتسب طريقة التفكير اللايقة بإنسان القرن الحادي والعشرين ولا بيخلينا نكتسب الوعي اللازم لإدارة الحياة .. والحقيقة أنا باتصدم كل ما اشوف طريقة التفكير الضحلة عند كتير من شباب اليومين دول .. لازم تكوني اشتغلتي على نفسك كتير علشان تبقي فعلا إنسان واعي وقادر على فهم الحياة والتفاعل معها

-أنا فعلا بشتغل على نفسي من ساعة ما اكتشفت أهمية القراءة .. أنا كل شهر تقريبا باقرأ كتاب جديد ومفيش أسبوع بيعدي إلا وأكون شوفت فيلم وثائقي واحد على الأقل وكام محاضرة من محاضرات TED وباسجل كل اللي استفدته في مذكراتي .. أنا ممكن أمسك لك القرن العشرين سنة سنة وأحكي لك عن حدث معين حصل في كل سنة .. بس اللي مايزهقش!!

-بس الموضوع مش بالحفظ .. الموضوع بالقدرة على التفكير السليم في أي موقف والمرونة الذهنية اللي تخليكي تتعلمي أي حاجة جديدة بنفسك

-أنا فاهمة قصدك إيه يا أستاذ (نبيه) وفاهمة أن قدرتي على اتخاذ الموقف السليم في أي حدث بتتطلب مني درجة من الوعي والفهم والبصيرة ومن كتر ما باشوف ناس ماعندهمش وعي ولا فهم صحيح دة بيخليني حريصة أكتر أني ماكونش زيهم ..أنا شايفة الانحطاط الفكري الموجود عند بعض الناس و شايفة زيك تمام أن مشكلتنا في الأفكار أكتر من أي حاجة تانية

-عندك حق .. أنا برضه مؤمن بكدة بس مش عارف أنتي عرفتي ازاي أن دة رأيي!! طيب ممكن أعرف من هو الكاتب المفضل عندك من العرب وغير العرب؟

-من العرب مصطفى محمود ومن غير العرب نعوم تشومسكي ومن كلامك يبدو لي أن أكيد الكاتب المفضل عندك هو نعوم تشومسكي برضه

-صحيح .. عرفتي إزاي؟؟ الحقيقة أنا شايف يا آنسة (رزان) أن أكبر دليل على قوة التفكير والفهم عند حضرتك هو أنك فهمتيني أنا شخصيا!! ودة يخليني أقول من دلوقتي أن أنا مرتاح لحضرتك جدا ونفسي الموضوع يكمل على خير

(أم رزان): على بركة الله يا أولاد

-شكرا يا طنط

#قصص_الصالون

#الصالون .. ادخل البيت من بابه