عريس مُفكر!
-أنا ملاحظ يا آنسة نرجس أن أفكارك بسيطة جدا .. الحياة أصبحت معقدة والأفكار المركبة هي اللي بتصلح لإدارة الحياة في الوقت الحاضر
-مش فاهمة قصدك إيه يا أستاذ فكري!
-يعني مثلا لما تقولي أهم حاجة هي الاحترام المتبادل بيننا دي فكرة بسيطة لكن لما أنا أقول لك أن احترامي ليكي غير مشروط بأي شرط لكن تجاوبي معاكي عاطفيا هايكون متوقف على قدرتك على التفاعل البناء مع أفكاري فدي فكرة مركبة
-آه فهمتك .. والأفكار المركبة دي بتتجاب منين؟
-أفندم؟
-قصدي يعني الواحد يعمل إيه علشان أفكاره تبقى مركبة مش بسيطة؟
-أبسط شيء يعمله هو أنه يقرأ كتير ويتأمل كتير ويفكر بعمق
-بس التفكير الكتير دة ممكن يعمل للواحد صداع فما بالك لو كان كمان تفكير بعمق؟!
-يعني حضرتك معندكيش استعداد تغيري طريقة تفكيرك كما وكيفا؟
-ولا شكلا ولا مضمونا!!
-طيب تقدري تقولي لي ليه البنات بيبقى عندها استعداد تروح الجيم علشان تخس وتعجب العرسان لكن مش بيبقى عندها أدنى استعداد تغير من طريقة تفكيرها .. ليه المجهود الذهني أصعب على نفس البنت من المجهود البدني؟
-علشان الجسم باين لكن العقل متداري! فالجسم يستاهل أكتر الواحد يتعب علشانه!
- العقل متداري؟ متهيألك!! على أي حال لو سلمت لك بأن الجسم باين لكن العقل متداري فأكتر المشاكل بتحصل بسبب العقل المتداري! فرصة سعيدة يا آنسة نرجس!
#قصص_الصالون
#الصالون .. ادخل البيت من بابه
www.elsalon.net
