عريس من الفيسبوك!
-أهلا وائل .. يا ترى العروسة اللي رحت زرتها في البيت امبارح عجبتك؟
-عجبتني إيه بس يا هاني .. الصورة اللي كنت واخدها عنها طلعت فوتوشوب!
-فوتوشوب ازاي؟
-الصورة اللي كانت حاطاها لنفسها على الفيس طلعت متعالجة ببرنامج فوتوشوب والأصل حاجة تانية!
-طيب دة أنت حالك أحسن من حالي لأن آخر عروسة قابلتها طلعت واحدة تانية خالص
-ليه كانت حاطة صورتها من ١٠ سنين؟
-لا يا سيدي .. كانت حاطة صورة موديل مكان صورتها الشخصية على الفيس وأنا افتكرتها صورتها الحقيقية ولما رحت البيت والعروسة دخلت الصالون افتكرتها أختها وأنا قاعد مستني العروسة تدخل لحد ماعرفت أنها هي العروسة!
-علشان تحرم تخطب من الفيس!
-طيب ما أي عروسة هاتخطبها أكيد هتلاقيها على الفيس بس المهم يكون اللي على الفيس وش العروسة مش وش الفنانات والموديلات .. البنات اللي بيحطوا صور موديلات وبنات جميلة كأنها صورهم الشخصية دول معندهمش ثقة في نفسهم!! لو مش عايزة تحط صورتها تحط صورة وردة مثلا لكن ليه تحط صورة واحدة تانية أجمل منها وتخلي الشباب اللي زيي ينجذب ليها وياخد المشوار على الفاضي؟
-عندك حق .. وبالمناسبة أنت حاطط صورة إيه في بروفايلك؟
-أنا حاطط صورة ممثل هندي مش مشهور كتير
-تعرف أنك شخص مستفز وتستاهل اللي حصل لك؟
#قصص_الصالون
#الصالون .. ادخل البيت من بابه
www.elsalon.net
