عريس من اثمانينات وعروسة من التسعينات!
-أنا يا آنسة ريتاج لما فتحت عيني على الدنيا كانت وسيلة الترفيه والمعلومات الوحيدة المتاحة هي التلفزيون الأبيض والأسود أبو تلات قنوات وجريدة الأهرام اللي كنت حريص أقرأ فيها باب بريد الجمعة للراحل عبد الوهاب مطاوع الصبح قبل صلاة الجمعة وبعد صلاة الجمعة كنت دايما أقعد أتفرج على برنامج سر الأرض وعالم الحيوان وخواطر الشيخ الشعرواي
-يعني حضرتك مكنتش بتدخل على الفيسبوك في الأيام دي يا أستاذ مختار؟
-إحم إحم .. الحقيقة مكانش الانترنت لسة دخل مصر بس ممكن تعتبري بريد الأهرام كان بمثابة الفيسبوك بتاعنا في الأيام دي ولما الانترنت دخل في أواخر التسعينات بدأت أدخل في المنتديات الكتيرة اللي ظهرت ساعتها
-طيب وبالنسبة للدراما .. كانت إيه الدراما المفضلة عندك؟
-هو طبعا كانت بتتعرض حاجات كتير زي أبنائي الأعزاء شكرا ورحلة أبو العلا البشري وأرابيسك وعلي الزيبق وضمير أبلة حكمت والوسية لكن الدراما المفضلي عندي هي اللي كانت بتيجي في برنامج حياتي بتاع فايزة واصف لأنه كان بينقل من الواقع!
-يعني حضرتك عمرك ما اتفرجت على محمد رمضان ولا محمد هنيدي؟
-أيوة طبعا محمد رمضان دة كان لاعب في النادي الأهلي وكان شخص محترم جدا أما محمد هنيدي فأول ما طلع أغنية كامننا عرفت أن مصر بقى فيها حاجة مش مظبوطة وبعدها قررت السفر برة مصر ولسة راجع من ست شهور ... ولحد دلوقتي عمال استكشف إيه اللي حصل في مصر خلال السنين الطويلة دي!
-يعني لا نت ولا فضائيات؟ أمال كنت بتعرف اللي بيحصل في الدنيا ازاي يا أستاذ مختار؟
-كنت بشوف نشرة أخبار الساعة تسعة وبعد ما خرجت برة مصر عرفت أن الدنيا أوسع بكتير من اللي كنت بشوفه في الأخبار بس للأمانة التلفزيون برضه كان بيجيب حاجات حلوة بتفرجنا على العالم زي عالم البحار للراحل حامد جوهر والعلم والإيمان لمصطفى محمود
-عالم البحار؟ فاضل تقول كمان أن أغنيتك المفضلة كانت حلوين من يومنا والله لسيد مكاوي .. مش كدة؟
-هاهاها .. مش للدرجة دي يا آنس ريتاج .. لكني كنت بحب أسمع أغنية أنا مهما خدتني المدن لعماد عبد الحليم الله يرحمه!
-أم ريتاج: أنا شايفة يا أولاد أن مفيش بينكم فجوة كبيرة ولا حاجة زي ما أنتم مكبرين الموضوع كدة ... هو بس الأستاذ مختار أول ما يعمل له حساب على الفيس هيلاقي نفسه عاش في الجو بتاعك يا ريتاج وبقى زيك تمام .. مش كدة برضه يا أستاذ مختار؟
-الحقيقة أنا بالفعل بدأت أعرف هي بتفكر ازاي لأني بشوف الثقافة دي حواليا في كل مكان من أول ما رجعت مصر لكن دة مش معناه إني هاقبل إني أخلي دي الثقافة بتاعتي وأنسى كل الحاجات الحلوة اللي اتعلمتها في مصر قبل ما أسافر
-على بركة الله يا أولاد
-شكرا يا طنط
#قصص_الصالون
#الصالون .. ادخل البيت من بابه
www.elsalon.net See Less
