عريس مثقف!
-ممكن أعرف يا آنسة (بسمة) هل ليكي أي كتابات أو آراء بتعبري عنها في السوشيال ميديا؟
-الحقيقة أنا لما بلاقي بوست بيعجبني باكتب في التعليقات (تم) ودي أكتر حاجة باكتبها في اليوم!
-يعني مابيكونش ليكي أي آراء تعبري عنها في موضوع البوست؟
-ما بحسش أني محتاجة اعبر عن حاجة لأن البوست لو عجبني بادوس لايك ولو ماعجبنيش بادوس ايموشن غاضب أو حزين
-طيب مفيش مرة جربتي تكتبي فيها رواية أو قصة قصيرة أو حتى قصيدة؟
-أيوة .. وأنا في خامسة ابتدائي كتبت قصة قصيرة عن تلوث البيئة وفزت بيها بجائزة في المدرسة
-تلوث البيئة!! إحم إحم .. طيب بالنسبة لقراءاتك .. إيه آخر كتاب قرأتيه؟
-قرأت كتاب كامل عن وصفات الحلويات الشامية من سنتين
-حلويات؟ .. ويا ترى إيه المناسبة السعيدة اللي خلتك تتعلمي عمل الحلويات الشامية؟
-أنا وصاحباتي عملنا حفلة لما تخرجنا من الجامعة بمناسبة أننا مش هنفتح أي كتاب تاني بعد كدة وقطعنا فيها كل كتب الجامعة!
-يا حفيظ!! .. طيب أستأذنك أمشي دلوقتي لأني لازم أخلص النهاردة الجزء الرابع من تاريخ الجبرتي اللي بيتكلم عن حملة نابليون .. ودة جزء مهم جدا أنصحك تقريه لو عايزة عقلك يبقى أجمل من الحلويات اللي بتعمليها .. فرصة سعيدة يا آنسة بسبوسة!
#قصص_الصالون
#الصالون .. ادخل البيت من بابه
www.elsalon.net
