عريس متزن!
-آنسة حكمت .. أنا أحب العروسة اللي تشاركني حياتي تكون متزنة نفسيا!
-تقصد إيه يا أستاذ هادي؟
-يعني باختصار مش متقلبة .. مش ألاقيها شوية معايا زي السمنة على العسل وبعد شوية تقلب مائة وتمانين درجة وتلوي بوزها شبرين من غير أي سبب مفهوم! ماحبش أعيش مع واحدة unpredictable !!
-وحضرتك متزن نفسيا .. مش كدة؟
-أُمّال .. ودايما باحكم العقل والمنطق في كل قراراتي! ودي أكتر صفة بالمناسبة عاجباني في حضرتك ومخلياني متمسك بيكي لأقصى درجة!
-طيب تقدر تقول لي ليه اتضايقت لما بابا بلغك أن مش مناسب مدة الخطوبة تكون طويلة زي ما أنت اقترحت؟
-إيه دة .. هو أنت رأيك كمان من رأي والدك ولا إيه؟
-أيوة بصراحة أنا مش بافضل الخطوبة تبقى طويلة جدا .. الهدف من الخطوبة التأكد من وجود التوافق .. وأول ما يتحقق الغرض دة يبقى خير البر عاجله!
-دي آخر حاجة كنت أتوقع أسمعها منك يا أنسة حكمت .. ازاي حضرتك مش قادرة تقتنعي بوجهة نظري لحد دلوقتي؟ أنا خلاص مش قادر استحمل النقاش معاكي أكتر من كدة النهاردة!!
-ليه حضرتك اتعصبت فجأة كدة؟ احنا بنتناقش بهدوء .. وبصراحة أنا مابقتش قادرة أتنبأ بتصرفاتك معايا!
-وأنا ماحبش أن خطيبتي في أول موقف بيننا تقف في صف أهلها .. أنا بصراحة مايخلصنيش كدة أبدا وهاضطر أمشي دلوقتي وأجيلكم الأسبوع الجاي إن شاء الله
-طيب قبل ما تيجي مرة تانية يا ريت تتصل ببابا علشان تتأكد أننا لسة مخطوبين!!
#الصالون .. ادخل البيت من بابه
#قصص_الصالون
www.elsalon.app
