عريس باشمهندس!
-وقلت لي بتشتغل مهندس إيه يا أستاذ سمير؟
-باشتغل مهندس معماري يا عمي
-طيب ليه مرضتش تعزمنا في نادي نقابة المهندسين زي ما اقترحت عليك وفضلت نتقابل هنا؟
-لأني مش عضو في نقابة المهندسين يا عمي
-ليه يا بني أنت مش خريج كلية هندسة قسم عمارة ولا فنون جميلة قسم عمارة؟
-الحقيقة لا دي ولا دي يا عمي
-أمال أنت خريج إيه يابني؟
-أنا خريج معهد إداري يا عمي
-طيب ازاي بتقول على نفسك مهندس؟
-لأني يا عمي شغال في المقاولات والتشطيبات وباخطط يكون عندي شركة زي شركة حسن علام اللي بالمناسبة ماتخرجش من أي كلية
-بس يا بني حسن علام دة ما قالش على نفسه أنه مهندس وأنت عارف أن بنتي دكتورة وأنت لما قلت لنا أنك مهندس افتكرناك فعلا مهندس!
-يا عمي هو يعني المهندس أمحوتب الفرعوني لما بنى هرم سقارة المدرج كان معاه شهادة من كلية هندسة؟
-لا طبعا يا بني .. بس الدنيا اتغيرت والعقليات اتغيرت عما كانت عليه وقت الفراعنة!!
-يا عمي إيه لازمة الشهادة إذا كنت قادر بفضل الله أفتح بيت وأصرف على بنتك؟
-الشهادة في حد ذاتها يا بني مش هي القضية لكنها فقط أصبحت في الزمن دة مقياس على حاجات تانية
-طيب يا عمي خريج الثانوية العامة اللي مش بيجيب مجموع هندسة دلوقتي بيدفع فلوس قد كدة ويدخل جامعة خاصة وياخد منها شهادة الهندسة .. هل دة ذنبي إني مكانش عندي فلوس أعمل زي كدة؟
-أنا عارف كدة يا بني طبعا ..
-وكمان النبي عليه الصلاة والسلام قال إذا جاءكم من ترضون دينه وخلقه فزوجوه ..
-ونعم بالله .. طيب تسمح لي نسمع رأي إيمان لأن النبي عليه الصلاة والسلام برضه قال لا تنكح البكر حتى تستأذن .. رأيك إيه يا إيمان؟
إيمان: هو أنت يا أستاذ سمير ما تعرفش أن النبي برضه قال المُتشبع بما لم يُعط كلابس ثوبيْ زور؟
-مش فاهم قصدك إيه يا دكتورة إيمان؟
-قصدي أن شغلك ومؤهلك مفيهومش أي حاجة عيب وكان ممكن تقول على نفسك مصمم أو مشرف تشطيبات أو مقاول لكن حضرتك لما تقول أنك مهندس وأنت في الحقيقة مش مهندس ولا حاجة فدة كدة تدليس وأنا بصراحة معايري الأخلاقية ما تسمحليش أتجوز واحد مدلس .. فرصة سعيدة يا .. باشمهندس!
#الصالون .. أول تطبيق لزواج الصالونات
ادخل البيت من بابه
#قصص_الصالون
www.elsalon.net
