عريس التيك توك!
- يعني دة مصدر دخلك الوحيد يا أستاذ ميدو؟ فيديوهات التيكتوك؟؟
= بالضبط كدة يا آنسة حكمة .. كل فيديو باعمله باكسب منه الشيء الفلاني والحمد لله!
- بس أنا دخلت قناتك وملاقتش أي محتوى عليه القيمة! كل فيديوهاتك مقالب وحوارات تافهة!
= إحم إحم .. وهو دة بالضبط اللي بيطلبه الجمهور في العصر دة يا أستاذة حكمة .. وأدينا بنرفّه عن الناس شوية!
- ويا ترى حضرتك ناوي تكمل في الفيديوهات دي بعد الجواز ولا هتدور على شغل بيقدم قيمة حقيقية للمجتمع؟
= الحقيقة يا آنسة حكمة بعد الجواز الدنيا هتتفتح قدامي لأني هابدأ أعمل معاكي فيديوهات جديدة عن حياتنا اليومية في البيت ودة هيجذب جمهور جديد بيحب المحتوى اللي من النوع دة .. وياسلام إذا بقى عندنا أولاد وبقوا يطلعوا معانا في الفيديوهات هتبقى حاجة عظمة! الجواز هيبقى نقلة نوعية بالنسبة لي!
- أفندم؟ حضرتك عايزني أطلع معاك في الفيديوهات أحكي للناس كل يوم طبخت إيه النهاردة ورحت فين وجيت منين وأقعد أتنطط في الفيديو أنا والأولاد علشان الناس تضحك؟
= مضبوط يا أستاذة حكمة .. وأنا اخترت حضرتك بعد بحث دقيق في السوق عن أذواق الجمهور وعرفت أن شخصيتك هي أكتر شخصية تجذب الجمهور اللي أنا ناوي أستهدفه!!
- جمهور؟ أنت عايز تتجوزني علشان الجمهور؟!! طيب يا أستاذ ميدو أنا أنصحك تدور على ممثلة تعمل معاك الفيديوهات مش على عروسة!
#الصالون .. ادخل البيت من بابه
#قصص_الصالون
www.elsalon.app
