عروسة نسوية جداً!
-أنا شايفة يا أستاذ (سامي) إن المرأة لها وظيفة مهمة جدا في الحياة لكن الوظيفة دي مش في البيت زي ما أنت فاكر ولكن في الشارع!!
-في الشارع؟ قصد حضرتك إيه؟
-يعني المرأة وظيفتها أنها تبني البلد زيها زي الراجل تمام
-تبني زي ما هي عايزة بس المهم ماتقصرش في حق بيتها ويبقى هو اللي ليه الأولوية
-واشمعنى يعني البيت يكون الأولوية عندي مش عندك أنت؟
-علشان أنت يا ست الكل هتبقي ست البيت وأنا هايبقى مطلوب مني أصرف على البيت من غير ما أطلب منك أي مساهمة مالية!
-نعم نعم؟ ست بيت .. ليه حضرتك شايفني لابسة ملاية لف و لا لابسة برقع؟ يا بيه أنا عايزة ابقى من سيدات المجتمع مش من ستات البيوت!
-والجواز هايبقى بالنسبة لك مجرد برستيج .. مش كدة؟
-مش بالضبط كدة .. لكن الزواج خبرة حياتية مهمة وحاجة كويسة أنها تتكتب في السي في بتاعي!!
-شوفي يا آنسة (عدلات) .. أنا معنديش مانع أنك تساهمي في تنمية المجتمع زي ما أنت عايزة بس بشرط أن دة مايجيش على حق البيت وحق الزوج .. يعني مثلا من أبسط حقوقي أني أرجع من شغلي ألاقي الغدا جاهز!
-وأنا كمان من حقي أرجع من شغلي ألاقي الغدا جاهز!!
-طيب كدة مين اللي هايعمل الغدا إن شاء الله؟
-قدامك حلين .. يا إما تجيب خدامة يا إما نطلب ديليفري
-وبالنسبة للأطفال .. هاتسيبيهم للخدامة برضه ولا هتربيهم ديليفري؟
-بالنسبة للموضوع دة ماتقلقش هاجيب لكل واحد منهم سمارت فون وهاتابعهم من شغلي على السوشيال ميديا زي ما صاحباتي في الشغل بيعملوا وماتنساش كمان أن اليوتيوب والفضائيات بيربوا!
-ما أنا شايف كدة قدامي دلوقتي!! طيب أستأذن دلوقتي علشان مايفوتنيش الغدا اللي بتعمله الحاجة والدتي كل أسبوع بنفسها وبتجمع فيه كل أخواتي وأزواجهم وزوجاتهم وأولادهم .. فرصة سعيدة يا آنسة (عضلات)!
#قصص_الصالون
#الصالون .. ادخل البيت من بابه
www.elsalon.net
