عروسة منفتحة!
-آنسة فتحية .. أكيد حضرتك مقدرة كمية الخجل اللي أنا حاسس بيها دلوقتي في جلسة التعارف لأن في الحقيقة دي أول مرة في حياتي أكلم بنت وجها لوجه أكتر من خمس دقايق!
-معقول أول مرة؟ يعني حضرتك مكانش ليك صحاب بنات في الكلية بتخرجوا تتفسحوا مع بعض؟
-لا أبدا .. كنت باخرج مع صحابي الولاد .. والمرة الوحيدة اللي كلمت فيها بنت في الكلية لما واحدة زميلتي كانت قاعدة في البنش اللي ورايا والقلم بتاعها وقع تحت مني وطلبت مني أجيبه ليها!
-طبعك غريب قوي يا أستاذ وجيه .. دة الشلة بتاعتي كان نصها ولاد وكنا دايما بنطلع رحلات مع بعض وياما عملنا مقالب في بعض!
-أها ... يعني حضرتك كنت مقضية فترة الكلية ضحك ولعب وجد وحب زي ما في أغنية عبد الحليم .. مش كدة؟
-بالضبط .. هو الواحد يعني بيعيش شبابه كم مرة .. دي كانت أيام متتعوضش .. وأنت كمان يا أستاذ وجيه المفروض تبقى open-minded شوية كدة ومنفتح على العالم .. عيش أيامك عيش لياليك .. خلى شبابك يفرح بيك!
-ويا ترى مين بقى في صحابك الولاد كان بيعمل دور قاضي البلاج؟
-الواد زيزو البرنس ..دة كان صاحب أخف دم في الشلة!
-تعرفي يا آنسة فتحية ليه مفيش حد من صحابك الولاد دول اتقدم لك يخطبك رغم أنكم كنتم مستلطفين بعض كدة؟ لأن الواحد من دول بيهزر مع البنات عادي لكن لما ييجي يتجوز بيبقى عايز واحدة مكلمتش ولاد قبل كدة .. أنا متأسف جدا ليكي يا آنسة فتحية .. أنا ليا مواصفات معينة في شريكة حياتي والطباع دي ماتناسبنيش أبدا.. فرصة سعيدة
#قصص_الصالون
#الصالون .. ادخل البيت من بابه
www.elsalon.net
