عروسة مش محجبة

١ مايو ٢٠٢١

-آنسة هايدي فيه نقطة أخيرة أحب أناقشها معاكي في جلسة التعارف

-تفضل خد راحتك يا أستاذ معاذ أنا برضه سألتك كتير

-حضرتك عندك استعداد تلبسي الحجاب بعد الزواج؟

-آه طبعا عندي .. وممكن جدا ألبسه قبل الزواج كمان .. دة الحجاب فرض من ربنا وضميري دايما مش مستريح أني لسة ملبستوش

-تمام أصل كل الستات في عيلتنا بيلبسوا الحجاب وهايستغربوا جدا لواتجوزت واحدة مش محجبة

-وأنا برضه عندي سؤال لحضرتك.. احنا قاعدين في الصالون من قبل العصر لحد المغرب وحضرتك يعني لا طلبت تصلي ولا حاجة!!

-إحم .. إحم .. أنا الحقيقة أكتر وقتي باكون برة البيت ولو افتكرت لما ارجع البيت بأصلي الصلوات كلهم مرة واحدة قبل ما أنام

-تصليهم مرة واحدة؟!! وكمان لو افتكرت؟! بصراحة أنا آسفة أنا قعدت معاك كل المدة دي ..الصلاة بالنسبة لي خط أحمر ..متأسفة جدا لحضرتك

-آنسة هايدي ..صلي على النبي أمال .. إيه بس اللي حصل خلاكي تغيري رأيك كدة؟

-أنا باصلي على النبي عليه الصلاة والسلام في اليوم ١٠٠ مرة .. روح أنت بس صلي الخمس صلوات اللي ربنا فرضهم عليك .. فرصة سعيدة يا أستاذ معاذ

#قصص_الصالون

#الصالون .. ادخل البيت من بابه