عروسة مش فاضية!

٩ مارس ٢٠٢١

-وممكن تقول لي يا أستاذ (فادي) بتعمل إيه في أوقات فراغك؟

-باعمل حاجات كتير بس لو فيه أي مباراة من الدوري الأسباني أو الإنجليزي شغالة لازم أسيب اللي في إيدي واتفرج عليها!

-أها...طيب ولو مفيش مباراة منهم شغالة؟

-يبقى الدوري الألماني أو الفرنسي!

-ولو مفيش مباراة من أي دوري أوروبي شغالة؟

-في الحالة دي بقى يا ستي بتابع للأسف أخبار الدوري المصري!!

-يعني حضرتك ما بتعملش حاجة في أوقات فراغك غير متابعة مبارايات الكورة؟

-لا إزاي؟!! أنا برضه باتفرج على أفلام الأكشن والأفلام الرومانسية ... ممكن أعرف حضرتك بقى بتعملي إيه في أوقات فراغك؟

-ماعنديش أوقات فراغ .. وقتي كله مليان!

-ليه حضرتك بتشتغلي ٢٤ ساعة في اليوم؟

-الحقيقة أنا مش باشتغل من الأصل!

-طيب ازاي مش بتشتغلي ومعندكيش أوقات فراغ؟

-دي حاجة أظن صعب عليك تفهمها لكن باختصار أنا عندي أنشطة تطوعية وباخد دورات على النت وباقرأ كتاب جديد كل أسبوعين وباعمل دراسات عليا وباحفظ قرآن وبذاكر لاخواتي الصغيرين وبساعد ماما في شغل البيت وباتعلم اللغة الألمانية وبمارس رياضة كل يوم وقربت أخلص تأليف أول كتاب ليا!

-يعني حضرتك عمرك ما اتفرجتي على ليفربول أو ريال مدريد ولا حتى برشلونة؟

-ولا عمري هاتفرج .. فرصة سعيدة يا أستاذ فادي!

#قصص_الصالون

#الصالون .. ادخل البيت من بابه