عروسة مشهورة!
-ممكن أعرف يا أستاذ كمال عندك كم متابع على السوشيال ميديا؟
-الحقيقة ولا واحد يا آنسة شهيرة! أنا بتعامل مع السوشيال ميديا كمجرد وسيلة لمعرفة الأخبار والأفكار الموجودة في المجتمع .. وشايف أني أنشر أفكاري في كتاب أحسن من أني أنشرها في السوشيال ميديا
-ولا واحد؟ أنت عارف أن فيه عشرين ألف بني آدم بيتابعوني على الفيس وحوالي عشرة ألف على تويتر وخمسة ألاف على الانستاجرام؟
-حصل لنا الشرف .. بس أنا في الحقيقة حاسس ان دي مجرد فقاعة ولو بتحددي نجاحك في الحياة بعدد المتابعين دول مش بتأثيرك في الواقع تبقي غلطانة .. لو اتقفلت المواقع دي النهاردة هتبقي أنتي بكرة ولا حاجة
-طيب ممكن تقول لي حضرتك ازاي بتقيس نجاحك في الحياة؟
-بقدرتي على التغيير على أرض الواقع مش بقدرتي على الحصول على أكبر عدد من لايكات الفيس .. وفي الحقيقة مايهمنيش لو كان عندك مائة ألف متابع لأني أنا في النهاية هاتجوزك أنت بس !!
-بس أنا مشهورة ودة معناه إني بعمل تغيير في المجتمع بكلامي وبوستاتي ..ازاي عايزني أتجوز واحد مش معروف زيك؟!
-شهرتك مفيدة لو كنت فعلا بتستغليها علشان تغيري الأفكار السيئة اللي في المجتمع بالكتابة أو بأنك تنشري الحكمة والخير والجمال بين الناس .. ممكن أفتح صفحتك على الفيس أشوف حضرتك بتكتبي إيه؟
-آه طبعا اتفضل
-إحم إحم .. أنا شايف ان كلها كوميكس أو كلام مالوش فايدة .. كنت فاكرك رزينة عن كدة شوية يا آنسة شهيرة!!
-إيه دة .. حضرتك بتستقل مني ولا إيه؟
-لا أبدا .. لكن أعتقد أنك ممكن تلاقي حد يناسبك أكتر مني في العشرين ألف متابع بتوعك اللي على الفيس .. فرصة سعيدة!
#قصص_الصالون
#الصالون .. ادخل البيت من بابه
www.elsalon.net
