عروسة فيلسوفة

١١ مايو ٢٠٢١

-مش شايفة يا آنسة (أفكار) أن من أكبر مشكلات الفلسفة الحديثة أنها مابقتش تفصل بين النظرية والتطبيق ولا بين الموضوعي والشخصي فأصبحت التجارب الإنسانية الدليل الوحيد على نجاح النظرية أو فشلها بغض النظر عن المحتوى الفلسفي والأخلاقي للنظرية؟

-أيوة طبعا يا أستاذ (برهان) هو دة اللي حاصل فعلا وعلشان كدة تلاقي كل الفلاسفة الكبار طلعوا نظرياتهم في فضاء فلسفي بحت وتأمل نظري مجرد من غير ما يكونوا متأثرين بأي تجربة بشرية وهو دة المنهج اللي أنا باعتمده في أبحاثي الفلسفية اللي أتمنى أننا نكملها سوا بعد الزواج إن شاء الله

-بس حضرتك مش شايفة أن المفروض شغل البيت يبقى ليه الأولوية والمكانة رقم واحد في حياتك كزوجة وتسيبك بقى من الفلسفة وهايبقى عندك فضاء كبير في المطبخ تتأملي فيه زي ما أنت عايزة؟

-أنا طبعا مؤمنة أن البيت له الأولوية وشايفة كمان أن مفيش تعارض بين واجباتي كزوجة وواجباتي نحو العلم والفلسفة كفيلسوفة .. والحمد لله أن تأملاتي الفلسفية وكتاباتي وأبحاثي مش بتحتاج أني أخرج من البيت لكن لو أنت شايف أن فيه تعارض فيبقى أنت اللي عندك فصام بين النظرية والتطبيق

-تمام آنسة (أفكار) .. أنا بس كنت بامارس معاكي نوع من الجدل الفلسفي اسمه دياليكتيك هيجل زي ما كان أفلاطون وسقراط بيعملوا مع تلاميذهم كنت باختبر بيه مدى حبك للفلسفة وأوعدك أني لن أدخر جهدا في سبيل أني ماحرمش البشرية من نظرياتك الفلسفية

(أم أفكار): على بركة الله يا أولاد

-شكرا يا طنط

# قصص_الصالون

# الصالون .. ادخل البيت من بابه