عروسة عندها روح رياضية
-آنسة سارة .. أنا شايف فيكي صفات كتير كويسة بس في حاجة أخيرة نفسي أعرفها ويا ريت ما يكونش فيها إحراج
-لا اتفضل اسأل براحتك إحنا في جلسة تعارف
-حضرتك أهلاوية ولا زملكاوية؟
-أفندم؟
-آسف إذا كان السؤال ضايقك .. بس أنا أهلاوي صميم ويهمني إن الإنسانة اللي تشاركني حياتي تشاركني كمان في حب الأهلي ونشجعه سوا .. لكن لو حضرتك زملكاوية فأنا ممكن أتقبل دة وأتعايش معاه لكن كل اللي أتمناه أن يكون عندك روح رياضية علشان ما تحصلش بيننا مشاكل خاصة عند مباريات الأهلي والزمالك!
-شوف يا أستاذ ..اللي قاعدة قدامك دي كابتن الفريق النسائي لكرة القدم لنادي الزهور وأنا لعبت كمهاجم وكدفاع وحارس مرمى كمان وأحرزت مع الفريق بتاعي عدة بطولات وشايفة أن هي دي الرياضة الحقيقية وأن من السفه أني أقعد مبحلقة في الشاشة ساعة ونصف أتفرج على غيري وأحرق في دمي وأعصابه علشانه .. حضرتك بقى بتمارس رياضة إيه؟
-إيه؟ رياضة إيه؟ .. أيوة أيوة .. أنا بامشي كل يوم ٥٠٠ متر لمحطة الأوتوبيس بدل ما اركب التوكتوك .. ودة طبعا لأني بحب رياضة المشي!
-٥٠٠ متر؟ يا ترى حضرتك هايكون عندك استعداد لو تزوجنا نلف التراك في النادي كل يوم؟
-هو التراك دة طوله كم متر؟
-مش كتير .. ٧ كيلومتر بس!
-٧كيلو؟ آنسة سارة .. قصدي كابتن سارة .. لو ارتبطنا إن شاء الله أوعدك أنسى الأهلي والزمالك تماما وهاشجع نادي الزهور بس بلاش حكاية التراك دي الله يكرمك .. ولو مصرة نجري مع بعض فأقترح نجري فوق السطوح بدل ما نتعب ونروح النادي كل يوم.. ودة طبعا بسبب ظروف شغلي بس!
-السطوح؟ طيب وليه تتعب نفسك وتطلع السطوح ما نجري ورا بعض في الشقة أحسن!
-فكرة ممتازة يا كابتن سارة!
#قصص_الصالون
#الصالون .. ادخل البيت من بابه
