عروسة عامية!
-آنسة هيفاء .. من أهم الفروق بين الإنسان العامي وغير العامي هو التعامل مع الأفكار وإنتاجها .. فالعامي لا يستطيع تقبل الأفكار الجديدة فضلا عن إنتاجها فهو يعيش بمجموعة محدودة من الأفكار بينما غير العامي لديه مرونة كبيرة في تغيير الأفكار وإنتاج أفكار جديدة .. فهو يتمتع بقدر أكبر من المرونة الذهنية من الإنسان العامي بالإضافة لقدرته على التفكير النقدي .. كما أن العوام تركيزهم مع المادة وليس الفكرة، ولذا فإن الذين يقودون التغيير ليسوا من طبقة العوام التي تقاد ولا تقود!
-وحسب التعريف دة حضرتك بتعتبرني عامية ولا مش عامية إن شاء الله؟
-دة يعتمد على أفكارك ومرونتك الذهنية اللي هاشوفها خلال فترة الخطوبة .. لو حضرتك قعدتي تعيدي وتزيدي في نفس أفكارك معايا ممكن أزهق وهاعتبر أني خاطب واحدة عامية!! ساعة ما حضرتك تتوقفي عن إنتاج الأفكار الجديدة هافكر جديا إني أفسخ الخطوبة!!
-بس أنا برضه ملاحظة أن حضرتك من أول القعدة عمال تعيد وتزيد في نفس الفكرة .. مفيش أي تجديد في أفكارك!
-يعني إيه؟ حضرتك عايزة تقولي إني شخص عامي؟
-لا العفو .. أنا بس حابة أقول لك إن أنا كمان ممكن أزهق!
-(أبو هيفاء) هيفاء عندها حق يا أستاذ بديع .. حضرتك عمال تتكلم في الأفكار والتغيير والمرونة الذهنية .. خلينا ندخل في المفيد!
-يا عمي أحب أؤكد لك إني مش عامي! أنا بس كنت مركز في قضية الأفكار لأن دي أصل مشكلتنا في الوقت الحاضر وأنا عايز أتجوز عروسة تكون سبب في حل المشكلة مش تكون جزء من المشكلة!
-هيفاء: وأنا المشكلة الرئيسية عندي هي مؤخر المهر اللي حضرتك مش عايز تكتبه!
-المهر والمؤخر هو أهم حاجة عندك؟
-آيوة طبعا هو دة اللي يأكل عيش في الزمن دة .. مش التفكير النقدي والمرونة الذهنية بتاعت حضرتك!
-زي ما وضحت لك المؤخر دة دين على العريس وأنا مش بحب يكون عليّ ديون .. فالمؤخر اللي تطلبوه أنا هازوده على المهر وادفعه كله مقدم ويبقى كدة مفيش عليّ أي ديون!!
-يعني حضرتك داخل ناوي على شر ومصمم أني مايكونش فيه مؤخر وكمان مش عايزنا نشارك في العفش علشان مانكتبش قايمة؟ أستاذ بديع .. أنا خلاص توقفت عن إنتاج الأفكار!
#الصالون .. ادخل البيت من بابه
#قصص_الصالون
www.elsalon.app
