عروسة جي بي تي!
- إنما مالكش حق يا حسن يا بني تفسخ الخطوبة بالشكل دة بعد ما كان الفرح فاضل عليه أسبوعين!
- واعمل إيه يا ماما إذا كنت اكتشفت إن كل كلامها معايا على الواتس مكتوب بالذكاء الصناعي باستخدام الشات جي بي تي .. هو أنا هاتجوزها هي ولا هاتجوز الشات جي بي تي؟!
- طيب يا ابني ما تسيبها تكتب بالذكاء الصناعي مش كفاية أن البنت متابعة التكنولوجيا وبتعرف تستخدمها كويس؟
- يا ماما الكلام المنمق اللي خدعتني بيه دة هو أكتر حاجة عجبتني فيها وخلاني أحس أنها عارفة كل حاجة في الدنيا .. لو كنت اتجوزتها كانت هاتتكلم معايا ازاي بعد الجواز .. ولا هتكلمني بالشات جي بي تي برضه؟
- طيب وازاي نهيت الموضوع معاها من غير ما تكسر خاطرها؟
- قلت في نفسي طالما هي بتكتب لي كل حاجة بالذكاء الصناعي فأنا كمان أعمل برنامج يستخدم الشات جي بي تي ويبعت رسائل الواتس مكاني وقلت له (أريد فسخ خطوبتي مع هذه الفتاة فضلا اكتب لها رسالة منمقة بالنيابة عني من غير أن تجرح مشاعرها وقم بالرد على كافة رسائلها بعد ذلك بطريقة مهذبة) وسبتها تتكلم معاه وهي فاكرة إنها بتكلمني أنا!!
#الصالون .. ادخل البيت من بابه
#قصص_الصالون
www.elsalon.app
