عروسة بيولوجية!
-آنسة انسجام .. أنا مؤمن أن الزوجة المثالية هي اللي تؤدي وظيفة نفسية وروحية وقلبية وعقلية لزوجها .. مش بس وظيفة بيولوجية!
-يعني إيه وظيفة بيولوجية يا أستاذ قدري؟
-يعني مش بس تكون مسؤليتها الحفاظ على الحالة البيولوجية لزوجها من أكل وشرب وخلافه! ولكن كمان تشاركه اهتماماته وتقرأ أفكاره وتكون له صديقة وأخت وحبيبة! وعلى رأي المثل اللي بيقول: أجمل حاجة يا روحي إنك توأم روحي .. هاهاها!
-أيوة فهمت حضرتك .. أحب أطمنك من الناحية دي تماما .. ماتشيلش أي هم من ناحية التقارب الفكري والمشاركة الوجدانية .. ومن ناحية التقارب الثقافي والمعرفي .. فأنا دائرة معارف متنقلة! وأما من الناحية البيولوجية .. فمعرفتي بالطبخ لا تزيد عن معرفة حضرتك بالنظرية النسبية!
-يعني إيه؟
-يعني مش باعرف أطبخ!!
-أمال هناكل ازاي؟
-هاتعلم في حضرتك!
-تتعلمي فيا؟ ويا ترى تعلمك فيا هايستمر قد إيه؟؟
-ماتقلقش من الناحية دي لأني باتعلم بسرعة!
-الحقيقة يا آنسة انسجام .. لولا أني حاسس بالانسجام معاكي وشايف أن أنتي فعلا الزوجة اللي ممكن فعلا تشاركني حياتي الروحية والعقلية والفكرية ماكنتش هوافق أنك تتعلمي فيا .. ولكن أنا هاقبل دة عن طيب خاطر!
-(أم انسجام): على بركة الله يا أولاد .. ما تتفضل تاكل القطايف يا أستاذ قدري .. دة انسجام عاملاها بإيديها مخصوص بعد ما دورت على الطريقة في النت ساعة كاملة!
-(قدري في سره): التعلم بدأ .. ربنا يستر!
#الصالون .. ادخل البيت من بابه
#قصص_الصالون
www.elsalon.app
