عروسة أديبة!
-أيها المجهول .. أبوح لك بأنّات حروفي المبعثرة على شواطئ الذكريات وهي تنصت لهدير الموج وتتبختر تحت آشعة الشمس كعرائس البحر ثم تتعثر وتتلعثم إذ لم تجد من يفهمها فتتساقط كحبات اللؤلؤ وترجع القهقرى فتحلق بعيدا بأجنحة من الشوق قاصدة موطنها وتخترق جدار القلب في صمت ثم تتدثر برداء أبيض كالكفن وتنتظر قادما آخر من غياهب المجهول و...
-جميل يا أستاذة نسمة .. كلامك منمق ومترتب كويس لكن أنا مش فاهم أنت عايزة تقولي إيه!!
-إزاي يا أستاذ حضرتك مش فاهم كلامي المشحون بالعاطفة والبلاغة؟
-البلاغة اللي أنا أعرفها هي القدرة على توصيل المعنى بأفضل وأقصر الطرق .. بس المعنى اللي حضرتك تقصديه مش واضح!
-مش واضح ازاي يا أستاذ .. سلامة عقلك .. دة القطعة الأدبية دي قعدت أكتب فيها ليلة كاملة وسيادتك جاي تقول لي مش واضحة .. يبدو أن مالكش في الأدب زي ما أنا كنت فاهمة يا أستاذ عباس!
-يا ست الكل أنا قرأت لفطاحل الأدباء وكبار الكتاب وكلامهم كان واضح والواحد يعرف الكاتب منهم قصده إيه بسهولة .. لكن الأدباء بتوع اليومين دول زي حضرتك كدة بيرصوا الكلمات جنب بعض وخلاص .. كلمة من هنا وصورة بلاغية من هناك وفي الآخر الواحد مايعرفش الكاتب منهم عايز يقول إيه .. يعني مثلا ممكن تقولي لي إيه هو المجهول اللي حضرتك بتخاطبيه؟
-إيه هو المجهول؟؟ المجهول كان المفروض يبقى حضرتك يا فهيم لو كنت مركز كويس!!
-إيه .. حضرتي؟ أنا المجهول؟!!
-أيوة حضرتك!! بصراحة مش عارفة ازاي هاقدر أعيش مع واحد مش بيفهم كلامي ومش بيقدّر موهبتي الأدبية .. أنا خلاص صرفت نظر عن الجوازة دي يا أستاذ عباس!
-طيب يا أستاذة نسمة أتمنى لك حظ سعيد مع مجهول غيري!
#قصص_الصالون
#الصالون .. ادخل البيت من بابه
www.elsalon.net
