العريس عالم فيزياء
-أنا مرتاح لحضرتك يا آنسة ليلى لكن فيه حاجة بتؤرق تفكيري ومش عارف أناقشها معاكي ازاي
-اتفضل اتكلم براحتك يا أستاذ ماجد احنا في جلسة تعارف
-أنا رجل عالِم فيزياء وحياتي كلها تدور حول العلم وأمنيتي أن البنت اللي تشاركني حياتي تساعدني على أداء مهمتي في الحياة وتساعدني أتفوق على ألبرت أينشتين وألاقي نظرية أحسن من النظرية النسبية!
-ثق يا أستاذ ماجد إننا إذا تزوجنا هاكون إن شاء الله أكبر سند ليك على أداء رسالتك في الحياة وماتنساش أن وراء كل رجل عظيم امرأة
-لكن من اللي شايفه حواليا أن البنت المصرية للأسف مخها بيبقى في حاجات تانية وبتشغل جوزها بأمور تافهة ... مثلا ازاي متوقعة مني أركز في أبحاثي ونظرياتي لو كان كل كلامك معايا بيدور حول الفسح والخروجات و الأفلام والمسلسلات وأفضل أنواع الزيت والسكر وجارتنا فلانة قالت و خالتك علانة سوّت؟ ودة طبعا مش معناه أني عايز واحدة ذات عقلية علمية فذّة ولكن على الأقل واحدة بتفهم كويس!
-شوف يا أستاذ ماجد .. عايزة أقول لك أن أنا مش من نوعية الستات اللي بتشوفهم في المسلسلات المصرية ولا في برامج اللت والعجن اللي في الفضائيات .. أنا روحي شرقية آه لكن ثقافتي خليط بين الثقافة العربية والغربية .. أنا بطلت أسمع أي قناة فضائية مصرية من خمس سنين ولو فتحت معايا أي موضوع هتلاقيني باعرف أحاورك فيه وهتلاقي عندي آراء عنه لأني تقريبا عارفة حاجة عن كل حاجة .. وعلى فكرة أنا عندي برنامج فكري ماشية عليه من سنتين لحد ما أكوّن نفسي معرفيا
-طيب تعرفي تقولي لي ليه أينشتين ماحبش ميكانيكا الكم؟
-رغم إني مافهمش في الفيزياء كتير لكن من اللي قريته في سيرة أينشتين فأعرف أنه كان عنده قناعات معينة عن الكون ضد اللي بتقوله ميكانيكا الكم
-كلامك صحيح .. طيب تعرفي تقولي لي نيوتن عرف إيه لما التفاحة وقعت على راسه؟
-هو أكيد معرفش أن الأشياء تسقط لأسفل لأن دي حاجة كل الناس عارفاها لكنه أكيد أدرك أن فيه قوة بتشد الأجسام للأرض وأن قوة الشد دي هي نفسها اللي بتشد القمر ناحية الأرض يعني اكتشف أن قانون الجذب دة حاجة كونية بين الأجسام كلها
-فعلا كلامك صحيح .. الحقيقة أنا اطمنت دلوقتي أني لقيتي الإنسانة اللي ممكن أناقش معاها نظرياتي قبل ما أعلنها للناس
-وأنا باطمنك أكتر أني هاحاول أفهم كل نظرياتك من غير ما أتعمق فيها طبعا وماوعدكش أني هاكون فيزيائية زيك!
(أم ليلى): على بركة الله يا أولاد
-شكرا يا طنط
# قصص_الصالون
# الصالون .. ادخل البيت من بابه
www.elsalon.net
