العريس الآلي!
-أنا يا عمي اسمي س١٩ وباشتغل في محطة الطاقة الشمسية اللي جنب بيتكم ويشرفني أني أطلب إيد بنتك الآنسة لولو!
-عمك؟ وبتستجرا تقول لي عمك يا قليل الأدب؟
-أنا عارف يا عمي إن فيه فرق كبير بيني وبينكم .. أنا روبوت وأنتم بشر لكن..
-ولما أنت عارف كدة يا عديم المنطق إيه اللي خلاك تتجرأ وتطلب إيد إنسانة لا هي زيك ولا من توبك؟
-أنا أول ما شفتها يا عمي راكبة الحوامة ونازلة بيها من السما علشان تشحنها من المحطة اللي بشتغل فيها فيه حاجة نورت جوايا .. المهندس اللي صممني حب يعمل مقلب في خطيبته وحط صورتها في البرنامج بتاعي وأنا بقيت مُبرمَج أني لما أتجوز لازم أتجوز حد يشبه الصورة دي وبنتك هي أكتر واحدة تشبهها!
-أنت عارف أن لولو مرشحة تكون في الوفد المصري اللي هايروح يستكشف المريخ الأسبوع الجاي؟ ازاي عايزها تتجوز روبوت حقير زيك وظيفته يكنس المحطة؟
-أنا عارف يا عمي أن زواج روبوت بإنسان دي حاجة محدش عملها قبل كدة لكن بالنسبة لي دي فكرة مش مستحيلة ببساطة لأن مفيش حاجة في البرنامج بتاعي بتقول عليها مستحيلة .. كما أن فكرة الطبقية الموجودة عندكم أنتم البشر دي برضه مش موجودة عندنا في عالم الروبوتات .. مفيش روبوت أحسن من التاني غير بالبرنامج اللي فيه مش بمين اللي صممه ولا بشكله ولا بالمنطقة اللي هو موجود فيها
لولو: ازاي يا س١٩ يا اللي ماعندكش ذرة إحساس عايزني أتجوز روبوت زيك ماعندوش قلب ولا يعرف حاجة اسمها حب .. أنا عايزة اتجوز إنسان زيي يحبني وأحبه .. مش روبوت ماعندوش مشاعر!! أنا كنت مخطوبة للمهندس ذكي ذكي أشهر مهندس #ذكاء_صناعي في مصر وفسخنا الخطوبة علشان ماتفاهمناش مع بعض .. هاتجوزك أنت؟؟
-لو فاكرة أن كل البشر عندهم قلوب وقادرين على الحب وتكاليف الحب فأنت غلطانة .. أنا هاديلك فرصة تبرمجيني زي ما أنت عايزة وهاكون من إيدك دي لإيدك دي .. تقدري تلاقي فين إنسان بشري يخليك تعملي فيه كدة؟
-أما إنك روبوت بارد صحيح .. أنا عايزة إنسان له شخصية أتعامل معاه زي ما هو وأعرف أتكلم معاه ويفهمني وأفهمه .. مش حاجة مالهاش رأي ولا شخصية أبرمجها زي ما أنا عايزة! أنا عايزة واحد عنده روح يعرف يهزر ويزعل ويفرح ويرضى ويغضب ويعبر عن رأيه مش حد متبرمج زيك يقول الكلام اللي حافظه
-يعني دة قرارك النهائي؟ يا ريت تفكري تاني يا آنسة لولو !!
-هو اللي برمجك دة حط فيك فيروس رخامة كمان؟ أيوة قراري النهائي .. أنا قلت لأ وهي لأ .. عايز تخطبني بأي حق؟
-طيب يا آنسة لولو .. أتمنى لك حظ سعيد مع إنسان له شخصية .. بس يا ريت تختاري الشخصية الصح اللي فيها شبه منك علشان تعرفي تتكلمي معاه ويفهمك وتفهميه .. هذه رسالة من المهندس ذكي ذكي الذي قام ببرمجتي!
#قصص_الصالون
#الصالون .. ادخل البيت من بابه
www.elsalon.net
