الخطوبة الساعة: ستة ونص وخمسة!

٣ مارس ٢٠٢١

-إزاي يا ماما العريس يتأخر أربع دقايق كاملين عن الميعاد اللي اتفقنا عليه؟

-معلش يا بنتي الغايب حجته معاه

-يا ماما دول مش دقيقة ولا اتنين .. دول ٤ دقايق وفي أول زيارة .. احنا معادنا خمسة إلا خمسة بالضبط ودلوقتي خمسة إلا دقيقة!! دة أكيد شخص مش بيحترم مواعيده!

-أهو الجرس بيرن أهو ..مش قلت لك يا بنتي؟

(بعد قليل..على باب المنزل)

-انا رنيت الجرس من ٣٠ ثانية بالضبط يا ماما .. معقول محدش فتح الباب لحد دلوقتي مع انهم عارفين اننا جايين؟! دول أكيد ناس معندهمش تقدير!

-يا بني صبرك بالله يمكن بيستعدوا ولا حاجة

-كدة بقوا ٣٧ ثانية يا ماما وانا متأخرتش عن ميعادي الا بسبب كابتن أوبر اللي صمم يمشي بمزاجه مش على الجي بي إس فدخل في طريق ازحم من الطريق اللي كان على الخريطة ب ٣ دقايق و٥٥ ثانية ..

(في الصالون)

-أنا متأسف يا آنسة سوسن أني تأخرت أربع دقايق عن ميعادي

-لا ولا يهمك إحنا برضه اتأخرنا شوية عقبال ما فتحنا الباب

-أنا شايف أن فيه بيننا قبول بنسبة ٩٤ ٪ ودي حاجة مطمئنة جدا اننا نمشي في اجراءات الخطوبة

-وأنا كمان مرتاحة للموضوع يا أستاذ حازم بنسبة ٩٣٪

-اقترح نخلي الخطوبة الخميس ١١ مارس الساعة ٦ ونص إلا خمسة ان شاء الله

-ممكن نخليها ستة ونص وخمسة علشان هايبقى عندي شغل كتير في اليوم دة؟

#قصص_الصالون

#الصالون .. ادخل البيت من بابه