التوافق المستحيل
-أحب أقول لك يا أستاذ ذكي أني قرأت روائع الأدب العالمي كله مثلا قرأت بالإنجليزي لشكسبير وديكنز وبالفرنساوي لفولتير ومولير وبالألماني لجوتة وفرانز كافكا.
-اسمه (كيفك) ولا (كافكا)؟ دة يبدو لي كأنه اسم (معسل) مش اسم إنسان .. هاهاها!!
-يعني إيه (معسل) يا أستاذ ذكي؟
-لا لا .. ما تخديش في بالك .. بس ممكن أطلب منك تشيلي التكليف بيننا وتقولي لي ذكي حاف بدال أستاذ ذكي و على فكرة صحابي على القهوة بيسموني ذكي استاكوزا!
-أنت بتقعد على القهوة؟ أنعم وأكرم!!
-وماله يا آنسة (راقية) ..القهوة جزء من الثقافة المصرية!
-وعلى فكرة يا أستاذ استاكوزة بالنسبة لثقافتي العربية فكتابي المفضلين هم توفيق الحكيم وأحمد أمين وطه حسين والعقاد ومصطفى محمود ومحمد الغزالي .. وبالنسبة لحضرتك؟
(تليفون ذكي يرن على نغمة أغنية للمطرب الشعبي حمو زيكا)
-إيه النغمة الغريبة دي؟ يا ترى دة أي نوع من الموسيقى يا أستاذ ذكي؟
-دة نوع جديد من الموسيقى تم اكتشافه في مصر وهنحاول نصدره لبقية دول العالم
-ربنا يستر .. طيب أنا هاسيبك دلوقتي مع ماما يا أستاذكوزة علشان الموسيقى الجديدة دي وجعت لي بطني وهابلغك ردي بكرة إن شاء الله
#قصص_الصالون
#الصالون .. ادخل البيت من بابه
